Wat??? Hef buurvrouw Teuntjen een nessien mit jonge höndjes?
't Was eind maart ärgens eind joar'n zestig en wie woon'n an de lierderstroate precies tuss'n Henk van de Kamp en slager Wilbrink in op nummer twaalef.
An de andere kante van slager Wilbrink en noas de weie, woar teg'nwoordig de Uutbuurt zien terrein hef, was net een mooie bungalow ebouwd. Onze nieuwe buurvrouw Teuntjen was, mit eur man Anton vanaf de timmerieje bie de Brink, noa disse mooie bungalow verhuus. Teuntjen had pret ögies en hiel wel van een grappien.
Toen wiele as kinder uut de buurte van eur heur'n dat ze een nessien jonge höndjes had wa’w niet meer te houw'n en woll'n dat mooie kleine spul graag bekiek'n, knuffel’n en vuul’n. Kom woensdag middag as iele vrie van schole bint ma kiek'n zei Teuntjen en iele meug ok vriendjes en vriendinnetjes meebreng'n.
Alle kinder uut de buurte wödd'n op’etrommelt en zo toog op woensdag 1 april een heel koor kinder noa Teuntjen öm 't nessien mit höndjes te bekiek'n.
’s Maarns op schole ha’w iederene veur de gek will’n houw’ mit 1 april grapp’n van, ie heb een scheur in de broek of rok of kiek uut oe schoeveter zit lös of wit ik völle wat veur gekkegeid nog meer. ’s Middags was wiele dat al helemoale weer vergèt’n en opgewond’n toog 't koor kinder op Teuntjen an.
De pret ögies van Teuntjes glomm'n nóg meer as anders en verroaj'n op een of andere maniere iets wat wie as kinder nog niet goed deur hadd'n ma al gauw bleek dat ze ons gluui'nd te pakk’n had want d’r was gien nessien mit jonge höndjes, want veur ’t gaval as wiele ’t nog niet wiss’n ’t was 1 APRIL!
Enigszins beteuterd en ok wel beschaamp da’w ons zo te pakk’n hadd’n loat’n nemm’n krege wie as troos een koekjen uut de koekjestrommel.
Gek genog hef die 1 april grap van Teuntjen zo’n uutwärking op mien e’had däk ‘m noe zo’n zestig joar later nog steeds noa kan vertell’n.
Willy Rouwenhorst-❤gers
